Tuesday, July 27, 2010

سفر X-Files

موسم الصيف و الناس مسافرة و الصراحة في شغلات يعني جد بلاقي فش إلها تفسير !! ـ


ـ عند إقلاع الطائرة و هبوطها ليش لازم تضل الشبابيك مفتوحة؟


ـ ليش قبل ما تهبط الطائرة لازم يلموا الحرامات و السماعات زي اللي خايفين نسرقهم؟ و إذا خايفين نسرقهم ليش بلموش المخدات طيب؟ و إذا لأ ليش بستنوش لحد ما ينزلوا الناس من الطائرة و يلموهم؟ طيب مش أحسن يخلوا الناس ملتهيين بالتلفزيون و الإذاعة لحد ما تهبط الطائرة؟

ـ ليش أول ما تلمس عجلات الطائرة أرض المطار لازم الركاب يقيموا الحزامات زي كأنه الهم على قلبهم؟ مع إنه الطائرة لسة في مرحلة هبوط ؟


ـ أخيرا و ليس آخرا النقطة اللي ما إلها تفسير أبدا تقول إكس فيلز! لما يصير وقت إستلام الأمتعة و تطلع الشنط و تصير تمر على السير الجلدي المتحرك و بكون فيه 100 بني أدم واقفين يستنوا و 100 شنطة بتلف قدام الناس بس ولا حد لاقي شنطته!! يعني هذول شنط و أغراض مين؟

11 comments:

Moh'd Jarrar. said...

http://answers.yahoo.com/question/index?qid=20090226200724AAqX67o

ما بعرف بالنسبة للشغلات الثانية , بحسها هبل

وضيفي عندك كمان
الكللللللل بفتح الموبايلات اول ما تنزل الطيارة , بتصيري تسمعي الرنات والمسجات من مختلف الاصوات كمان

أحلى اشي مرة طلعت بطيارة صغيرة , ما فيها اوديو ولا تلفزيون ولاااا اشي
والا هي المضيفة بتوزّع سماعات علينا , بقولها طيب ماهو ما في اوديو عشان نسمع , ليش بتوزعي سماعات؟, ابتسمت ابتسامة ما الها دخل وقالتلي : انداري

Palestinian Princess said...

intresting answer!
بس مهو لما تكون الدنيا نهار بكونوا شايفين الطائرة كلها فش داعي يفتحوا الناس الشبابيك
:???:

بعدين على قولتك كل هبل من الناس .. مش عارفة شو بدها تفرق معاهم اذا استنولهم خمس دقايق بزيادة عبين ما توقف الطيارة و يقدروا يقوموا و ينزلوا
طبعا غير انه لازم يوقفوا بالممر و يستنوا واقفين عبين ما ينزلوا

بس حلوة شغلة السماعات بلا تلفزيون و لا راديو .. ما اسقعهم
:)

Whisper said...

بالنسبة للشنط عالحزام والكل بتطلّع, بدي احكيلك عن تجربه انهم بكونو موقفين الناس عالحزام الغلط

بعد نص ساعه انتظار عالحزام اللي مكتوب عليه اسم شركة الطيران من وين جاي, بيجي واحد من اللي بجرو العربايات و بحكيلنا هناك شنطكم :$

موضوع تشغيل الموبايلات هاد بقهرني, يعني الكابتن والمضيفة شوي وبدهم يبوسو ايدين الركاب, منشان الله لا تشغلو الموبايل, ولا حياة لمن تنادي, عأساس بدهم تيجيهم اهم مسج بحياتهم هلأ

السماعات, المشكله ان في قريب النا بشتغل بطيران الخليج بحكيلنا ان هالاشياء محسوبه ضمن التذكرة والمفروض تكون النا , يعني مش سرقة, بفلوسنا :)

Palestinian Princess said...

و الله مش دايما بنكون واقفين على الحزام الغلط يا ويسبر .. ساعات بكون المكان الصح و ما في غير طيارتنا و ما حد بلم الشنط الماشية من الواقفين

على قولتك.. أهم مسج بحياتهم بتوصلهم لحظة ما تنزل الطائرة .. تقولين كل الركاب همة رجال أعمال و شغلهم واقف على شعرة ما شاء الله

جد؟ السماعات من حق التذكرة؟ ولا لشو بلموهم!؟

الكيل بمكيالين said...

والله انا ما بقدر اخدمك كتير بتعليقي لاني عمري ما ركبت بطيارة ولا سافرت اصلا! بالله عليك فيه أبأس من هيك؟

إدعيلي اني اسافر يوم والف العالم وبوعدك اتقبل كل هالتصرفات وما انزعج بس اسافر!

سلام وحمدالله على سلامتك وانشاء الله تنبسطي كثير باجازتك.

LioneSS said...

هاييي ^_^
الحمدلله على سلامتك ^_^ طمنينا عنك كيف كانت الرحلة ^_^

هلأ بالنسبة للبطانيات و السماعات على ما اظن و على هوا ما سمعت انهم بلموهم قبل الهبوط عشان لو لا سمح الله صار شيء اثناء الهبوط هدول بعرقلوا حركة الناس في الممرات

يعني ممكن يشبكوا بالرجلين و انتي ماشيه فتفادي لهالشي بلموهم

بس و الطايره طايره و لا قدر الله صار شي اصلا ما رح يكون في مشي رح يكون كل شي طاير طاير @_@

الله يحمي الكل و يرد كل مسافر الى اهله سالم و غانم :)

Palestinian Princess said...

أنسة كيالة

الله يسلمك و يسعدك يا وردة

إن شاء الله ربنا بفرجها عليكي و بكتبلك تلف الدنيا و تنبسطي و ما تخلي شي بنفسك
:)


LioneSS

الله يسلمك و يسعدك حبيبتي
:hug:
رحلتي كانت منيحة بس مهلكة لأنه ما صحلي أنام ليليتها و الطريق جدا كانت متعبة و إنت بالشوب و الناس بتدافشك
:cry:

مش عارفة بس شغلت العرقلة مش داخلة عقلي
في إن في الموضوع
:re:

و زي ما قلت الله يرد الجميع سالم غانم لأهله

Shaheen said...

hamdella 3ala alsalameh :p

Palestinian Princess said...

hehe.. allah yesalmak :D

sheeshany said...

ما ظل شي الواحد يحكيه بعد تعليقات الإخوان و الأخوات

بس بدي أضيف إنو أكيد في أسراااااااااااار -شبه- خطيرة و ما كل ما يُعرف يقال
:p
إحنا مبرمجين لتنفيذ الأوامر، خلص... شوف شغلك و ما إلك

:)

Palestinian Princess said...

Haitham هيثم Al-Sheeshany الشيشاني

ههههههه
جد ضحكني تعليقك
:D

شفت بالله.. أكيد في قوى خفية قاصدة تعملنا مشاكل في السفر

على قولتك .. خلينا مثال المواطن العربي المطيع جدا و بلا وجع راس
:D