Friday, May 20, 2011

تمخض المجتمع فولد جيل من الأخر

اليوم صحيلي اشهد تخريج فوج جديد من بناة المستقبل! و يالهم من بناة و ياله من مستقبل! ما شاء الله
حفل تخريج ابنة خالي من احدى المدارس في فلسطين 

طبعا و بطبيعة الحدث .. الكل لابس اللي على الحبل و جاي و اللي مش لاقي جاي مزلط ... فش حد مقصر .. قصدي فش حد الا مقصر .. من تحت .. من فوق .. من الجهتين .. 
المهم و بغض النظر مش هون الموضوع و لا المشكلة.. اللي بدي احكي عنه شغلتين... 

أولاو بادئ ذي بدئ .. هل نحن شعب بموت باللت و العجن و الخطابات الرنانة و لا احنا شعب لا يملك قدرة الإستماع؟

لماذا حفل كهذا يجب ان يحوي 7 خطابات  طويلة الواحد تلو الأخر؟
كلمة مديرة المدرسة
كلمة مجلس الإدارة
كلمة نائب مدير التربية .. و اللي بقدرة قادر حول هذا الفوج الخريج لما اسماه فوج "المصالحة"!ـ
كلمة ضيف الحفل 
كلمة اولياء الأمور
كلمة الخريجين بالعربية
كلمة الخريجين بالإنجليزية

و لولا العيب لكان بالفرنسية و الهندية

طبعا اراهن اذا اي من الحضور استمع الى كلمة قيلت  و ان كان اي مما قيل ذا معنى او مغزى يذكر او حتى لا يذكر

لكن تسلايتنا العظيمة كانت الطلاب و ما ادراك ما الطلاب و هذا ينقلنا الى ثانيا

  في تاريخ حياتي القصير الطويل معا ..  لم اشهد جيلا مماثلا و لا مستوى اكثر انحطاطا.. ومن كان عنده ذرة امل في شيء اسمه تغير يبقى يقابلني!!ـ

تخيلوا معي المشهد .. على مسرح التخريج اصطف الخريجون بشكل قل ما يسمى انتظاما.. و بعد ان اخذ كل موقعه و مقعده .. بدأ البعض يمارس طقوسا ولا في الخيال

احد الخريجين الطلاب  شحن حاله بكيس بزر و نازل يفصفص بزر و يتفتف من منبره الأكاديمي 
  و واحد  اسعفه موقعه المتواري  من  انهاء مكالماته اللامتناهية!  الموبيل  ما نزل عن ذانه و هو تلفون رايح و تلفون جاي تقول بلحق الصفقات اللي عليه 
واللي رافع رجله و حاطت رجل على التانية زي اللي قاعد بقهوة
غير هل قنينة المي الحزينة اللي لفت على كل الطلاب و شربوا منها

تخيلوا شو ممكن يطلع من هيك جيل كهذا تمخض عن هيك مجتمع متكلف لا يستمع؟

مش عارفة شو اقول ... بس حبيت افضفض

تفضلوا تفرجوا




3 comments:

Haitham هيثم Al-Sheeshany الشيشاني said...

مشان هيك أنا سامحتهم بتخريج البكالوريوس و الماجستير!

لأنو كلنا هيك للأسف!

:(

Palestinian Princess said...

هههههههه

انا مش هيك

:)

لاتــــي said...

أكيد كان الحفل مملا،والطلبة معذزرين ياعيني..
لأنه شو لازمة
الخطابات الطويلة والكثيرة ديه.

عقوبة آخر الموسم..

الصور مكفية الموضوع شكراً لك