Tuesday, September 7, 2010

ما أحب و ما أكره من ممارسات دنيوية في هذا الشهر الروحاني

واجب علي من ليونس و مش حابه يخلص رمضان و انا مش عاملته مع أنه إلي فترة مش صحبة مع النت بالمرة

ما أحب في رمضان

 ـ*  بحب  الإرتياح النفسي اللي بحسه في أيام رمضان خاصة بعد مضي عدة أيام منه و كأنه نفس البني أدم تُغسل في رمضان
بتصير نفسي بسرعة بتبكي و بكون سعيدة لمجرد وحدة حكتلي السلام عليكم و ابتسمتلي و انا في المسجد

ـ* بحب الصلاة في المسجد و صوت الإمام و هو بقرأ القرأن 

ـ* بحب وقفتي بين الناس المختلفة أجناسها .. بين الهندية و السورية و السودانية و باكستانية.. ناس لا بعرفهم و لا عمري شفتهم بس بحس بالراحة و انا واقفة معاهم بين يدي الله في المسجد

ـ* بحب القطايف بس اللي بحبه أكتر القطايف و هي لسة عجين ما انحشت جبنة أو مكسرة
بعرف انه معدتي بتصير توجعني بعديها بس ما بقدر أقاوم

ـ* لما أكون في نابلس بحب كيف بصيروا يحطوا على رغيف الخبز حبة البركة .. بحس انه في شي جديد

ـ* بحب كيف بصيروا يزينوا البلاكين و الشبابيك في نابلس بالضواو الملونة


اللي بكرهوا من أمور بتصير في رمضان

ـ* بكره الجلي بعد الفطور .. بكون ما فيش طنجرة و لا صحن مش مستعمل و محطوط في المجلي من كتر ما في اشياء محضرة في المطبخ على الفطور  و بصير الواحد مش ملحق يخلص عشان ينزل يصلي العشا و التراويح

ـ* طبعا ما بحب المامات اللي بجيبوا اولادهم على المسجد و بدايقوا اللي بصلوا

ـ* ما بحب لما الإمام يوقف بين صلاة العشاء و التراويح او بين ركعات التراويح المتفرقة إستراحة و ينزلوا النسوان حكي و يبطل الواحد يسمع حاله شو بهمس مع نفسه من كتر ما بقلب المسجد خلية نحل زززززززززززززززز زنّ! و المفروض فيهم يستغفروا الله و يذكروه .. الله يسامحهم

ـ* بتدايق اني ما بحس في جو رمضان أثناء وجودي في فلسطين و عدم إنتباه الناس هناك (او على الأقل اللي بعرفهم) على الجانب الروحي و الديني للشهر الفضيل في حين الأمر مختلف في الإمارات و بنعطى الشهر حقه بشكل أكبر

ـ* بدايق أول الشهر عبين ما معدتي و راسي يتعودوا على نظام النوم و الأكل الجديد بس متى ما تعودت بصير الوضع ولا أحلى

ان شاء الله يكون ربنا تقبل منا رمضان و من الجميع
و كل عام و انتوا بخير

16 comments:

Haitham هيثم Al-Sheeshany الشيشاني said...

كلام جميل
عن الشهر الفضيل

و أكيد الملاحظات "السلبية" في المساجد أثناء قيام الليل صحيحة و مشتركة

*عجبتني شغلة القطايف "النيّة" ... يا فجعانة
لوول

H.

Palestinian Princess said...

ضحكتني على فجعانة
الله يسامحك
:D

الله يهدي الجميع و ياريت لو انه رمضان أطول من مجرد شهر

بسعدني مرورك يا هيثم

LUNAR. said...

يعني انا بفرق عنك اني بوكل القطايف وهي محشية لوز , بس قبل ما تنشوى او تنقلى

مرة في المسجد قلبت حسبة عند النسوان فوق , لدرجة انه الامام نفسه قعد ينادي عليهم بالمايكروفون

كل عام وانتي بخير وينعاد علينا جميعا بالصحة والسلامة يا رب

Um Omar said...

شو وراكي غير سيره الأكل و إنك تعشيمنا والدنيا صيام اه :c2:

منين بدي اجيب خبز عليه حبه البركه ,, اه,, منين :ag:

الكيل بمكيالين said...

آه.. نقطة الجلي هاي مشتركة!!
شكل عام جو رمضان في دول اخليج حلو وممتع سبق وجربته وبحس الناس زي ما حكيتي أكثر التزام واهتمام بشهر رمضان.

اما المسجد من زمان ما رحته للفوضى وكثر الاولاد الصغار.

خلص رمضان واجا العيد
كل عام وانت بخير:)

jafra said...

هلا كل عام و انت بخير خلص رمضان
على فكرة انا باكل القطايف نية :)
عن جد زاكية
و بنضم لقائمة فجاعانين

Palestinian Princess said...

LUNAR

هذا انت زي إخواتي و باقي الناس الطبيعية في موضوع القطايف
:D

بس و الله عيب اللي بعملوه النسوان في المساجد الله يسامحهم و يهديهم

و انت و كل أهلك و حبايبك بألف خير
:give:


Um Omar
thorryyyyyyyyyyyyyyy :(
مش قصدي أجوعك

خلص جيبي رغيف خبز و رشي عليه شوية حبة بركة بتخلص الموضوع
:p

كل عام و انت بخير
:give:

Palestinian Princess said...

أنسة كيالة

كل عام و انت بألف خير و ينعاد عليكي بالصحة و السلامة
:)

طب يعني شو رأيك الحل في موضوع الجلي؟
الصراحة إحنا البني أدمين بنزودها على الفطور .. يعني على مستوى شوربة عدس اللي أنا بعتبرها وجبة غذائية كاملة و مش محتاجة شي ينحط جنبها بتصير مجرد مقدمة غذائية لأصناف الأكل و الحلو اللي بتبعها
مش عارفة على شو الفجع في رمضان .. عاد معدته الواحد بتصغر مع الصوم

ان شاء الله يصير جو رمضان ديني أكتر في الأردن مش بس في دول الخليج و الله يهدي الجميع

تحياتي

Palestinian Princess said...

jafra

و انت بألف خير و محبة و سلامة
بسعدني جدا مرورك خاصة انك من فئت الفجعانين متلي
:p

أخيرا لقيت حدا بحب القطايف العجين متلي
yai! :D

Whisper said...

كل عام وانت بالف خير قرّب العيد :)

انا كمان بحب القطايف ني :)
بحط فيه سكر و ليمون
بس السنه ما اكلت قطايف غير كم من حبّه



المساجد للاسف هالظاهرة موجوده و خصوصا هلأ المدارس معطله, لو تشوفي في ايام روضه بكون المسجد, و الام ولا الها دخل كأنه ابن الجيران اللي بلعب بالكولر :(

ببدو يحكو الستات بس في حجّه بتقوم و بتضل تزقف ليسكتو كلهم :)

Palestinian Princess said...

Whusper

و انت بألف خير و سلامة

سكر و ليون مع القطايف الني
جديدة هاي
مش غلط أجربها


طب منيح انه في حدا بسكتهم هالنسوان لأنه عادة ما حدا بحكي شي و لو علقتي ما بعجبهم

بس صدقا بقدرش أفهم كيف النسوان بوصلوا لهاي الدرجة ما يسألوا فيها شو ولادهم بعملوا

Whisper said...

اين انت يا صبيه؟؟؟
اشتقنالك كتير كتير كتييييييييييير
طمنينا عليكي يا حلوه...

Palestinian Princess said...

حقك علي يا ويسبر

انا الدنيا اخدتني و جابتني و نسيت انه عندي بلوج من اصله

رجعالكم قريبا

يا بيييه ما احسنك
:)

Haitham هيثم Al-Sheeshany الشيشاني said...

مرحبا :)
هو انا كل ما درت وجهي بلاقي نانا ويسبر!!!

و الله بدي أتطمن عليك كنت - صارلك زمان غايبة
إن شاء الله المانع خير

ويسبر سبقتني :)

هديك اليوم كان فيه مذكرة جلب بحقك -ضمن آخرين- على مدونة واحد من الأصدقاء بس نسيت مين :p


ما تطولي، آآآه :)

Haitham هيثم Al-Sheeshany الشيشاني said...

u`ve been taaaaaaaaaaaaaaaaaaaaaaaaaagged

http://sheeshany.blogspot.com/2010/12/blog-post_11.html

:)

Palestinian Princess said...

الله يسعدك يا هيثم

كله من اصلك و ذوقك تسأل عني

انا ان شاء الله راجعة قريبا و بقوه
:)

بالله مين اللي مصدر مذكرة اصطحدار بإسمي؟ اثرت فضولي
:D


يسلموووووووووووو على التااااااااااغ
:)