Sunday, June 27, 2010

هنديتين و طنجرة ... 2

إستكمالا للجزء الأول هنديتين و طنجرة ... 1 يأتي الجزء الثاني ليحكي نهفات .. أو بالأحرى جلطات البنت الصينية اللي كنت ساكنة معاها و اللي من عمايلها السودة المتنيلة بستين ألف نيله بتفنّد إلها جزء كامل تتربع على عرشه من دون أي منازع


الصراحة أحكيلكم أنه قبل هاي اللحظة كان من الصعب جدا جدا إني أتكلم عنها و عن عمايلها (اللي إشي منها بنحكى و غيره ما بنحكى) لأني جديد لحسيت إني تعافيت من النكبة اللي عشتها معاها بعد مرور ثمان شهور و نص على اليوم اللي كسرت فيه جرة وراها

الجلطة 1

زي ما قلتكم في الجزء الأول.. البنت كانت في نفس البلوك أو العمارة اللي كنت ساكنة فيها و صدف مرة إنها كانت مريضة فشفقت عليها و طبختلها مرقة بخضرة و جاج و جمبيهم رز و أعطيتها إياهم تاكلهم .. البنت إنبسطت كتير و صارت تتشكرني عليهم و راحت الشغلة. بعد بأكمن يوم شافتني و حكتلي إنها إلا بدها تطبخلي مع إنها ما بتعرف تطبخ كتير (و أنا الصراحة من النوع الدقر في شغلة الطبيخ و ما بعرف أكل أي شي أو من أي حدا) بس ما حبيت أكسفها و إتفقنا على يوم و جابت هل أكلات. هلقيت الصراحة مش متزكرة تفاصيل اللي جابتلي ياه بس ممكن أختصره بكلمة وحدة "خبايص"! كان بذكر فيه شي مطبوخ ب سي فود بالإضافة إلى رز و طبق أخر رئيسي اللي هو لوبيا طبخاه بس مش مستوية و حاطة فوقيها لبن و أشياء أخرى أعجز عن تذكرها. طبعا أنا إنمغصت بس شوفت الأكل اللي ما كان ينعلك عشان ينبلع بس سايرتها. (على سيرة العلك هية بتاخد المركز الأول في مضغ الطعام بصوت عالي و الأكل مع إبقاء الفم مجولق عشان تشوف اللقمة و هي بتتاكل .. طبعا هاي السنفونية لعبت على أعصابي!) طبعا هي سألتني كيف اللوبيا و قلتلها إنها بدها طبخ و سِوا بزيادة على النار بس يمكن صعب هلقيت لأنها صارت حاطة عليه لبن. المهم مشيت العشا تمشاية و ودعنا بعض و مع السلامة. بعد بيومين شفتها , وفي سياق الكلام بسألها شو عملتي في اللوبيا؟ و ينزل علي الجواب كالصاعقة!!!!! هذا (أجلكم الله) حضرتها رايحة دالقة صحن الوبيا كله في التواليت "المرحاض" و فلاشششششششش الميه ! الله لا يعطيكي اياها العافية! ولك ليش هيك عملتي؟! قال مهي مش مستوية فكبيتها في التواليت عشان ممكن تطلع ريحتها لو كبيتها في الزبالة!! ولك ...أخ بس و مسكت أعصابي و ما ضربتها على شعرة


الجلطة 2

مرة كنا نتغدى أنا و إياها و كمان بنتين صاحباتي في فود كورت و أنا كنت طالبة أكل بيجي معاه صحن حمص صغير. فالأخت اللذيذة بتسألني شو هذا؟ قلتلها حمص! و لا هي بتقلي

what is it made of? tomato??????


الجلطة 3

لما حضرتنا سكنا البيت الجديد قعدنا فترة مش واصلنا لسة الإنترنت فكان الحل الوحيد نسطلقط إشارة إنترنت من الجيران و نشتغل عليه لربنا فرجها من عنده. الغريب إني كنت الوحيدة من بين البنات اللي زبط و لقيت سيجنال من الجيران و ما كانت الطنجرة لسة دارية بالطبخة. فبنحكيلها كيف عرفت إني أشتغل على النت بس الإشارة كتير ضعيفة و بنمزح و بنقول بلكن إذا طلعنا برة البيت نلاقي إشارة أقوى. الهبلة ما صدقت.. ركضت على اللاب توب تبعها و حملته و دارت في في كل الدار تفتش على إشارة و لما ما لقيت فتحت باب البيت و طلعت على ساحة البيت القدامنية و قفت تفتش و إحنا البنات إتسمرنا في مكانا من هول الصدمة و بعديها مشينا كل وحدة على مشاغلها.. بعد شوي إستفقدناها.. نطلع على الساحة ما في حد! حد خطفها؟ (و لسان حالنا يقول آمين) مش معقول! ولا وين راحت.. يا حزرتكم و ين طلعااااااات؟!!! الأخت المبجلة طلعت قاطعة الشارع و لاحقة الإشارة لواصلة لحديقة الجيران! و الله ستر لحقناها قبل ما توصل أبعد من هيك و تصير فضيحة بجلاجل! يعدمني إياها

الجلطة 4

مرة من المرات و إحنا في السوبر ماركت بنشتري أغراض البيت أنا و وحدة من البنات الهنديات و المدعوة إياها مرقنا على رفوف الكورن فلكس و هاي حبوب الإفطار و اللزي منه و قلنا أنا و الهندية بدنا ناخد منه. الطنجرة فجأة نطقت و سألت شو هذا؟ إطلعنا أنا و الهندية في بعض مش مصدقين.. و رحنا حكينالها هذا "سيريال" ما فهمت! يا ماما هذا كورن فلكس .. حبوب للفطور! تطلعت فينا و قالت ما بتعرفوا و سألت: هذا بنطبخ يعني!!!؟؟؟؟؟؟؟؟

ولك عليم الله أطفال زمبابوي بعرفوه


الجلطة 5

هاي النهفة صارت قدامي بس كتبتها وحدة من البنتين الهنديات و أنا بس رح أعملها كوبي و باست

the other night we went for a party and someone asked her do u drink؟ she said '' ya i drink tea''!

Another conversation went between a guy (T) and her (R) as follows:

T: What is your name?
R: R
T: WHAT? ( over loud music)
T:Ah! Ok! would you happen to know JUNG?
R: Are you JUNG?
T: Do boys & girls have similar names?, Is JUNG a boys name or a girls name
R: ARE U A BOY OR A GIRL?

EVERYONE AROUND ( INCLOSE HEARING PROXMITIY) LAUGHING ON THE FLOOR LAUGHING.

الجلطة 6

أول فاتورة كهربا و الغاز أجتنا على البيت كانت كبيرة بشكل مبالغ فيه. يعني مع قراءة عدادات الكهربا و الغاز ما بتيجي نص القيمة. فطبعا دخلنا بنقاشات إنه ليش هيك و قعدنا كل وحدة تتحزر إيش ممكن يكون السبب.. فجأة الصينية إكتشفت السبب و جابت التايهة! قال إحتمال سبب غلاء الفاتورة هو الباربيكيو اللي عملناه هديك اليوم و أكيد استعملنا غاز كتير! منطق برضه! عاد مش عارفة لشو كان الفحم يومها


الجلطة 7

البنت هاي كان عندها نظام غذائي غريب و مختلف عن أغلب المخلوقات اللي شفتها على وجه الكرة الأرضية. كانت كل يوم الصبح تصح من النجمة حوالي الساعة 5 أو 6 و تقعد تطبخ و تعبي الدار كلها ريحة طبيخ! تخيل تصح الصبح على ريحة طبيخ بدل قهوة .. معاها كانت أول مرة بحياتي أشوف حدا بطبخ ورق الخس! المهم كان الموضوع نوعا ما محتمل لحد ما أجا يوم و صحينا على ريحة قاتلة! والله رائحة تزكم الأنوف و مقرفة بشكل غير طبيعي!!! يعني لو إنها طابخا حدا ميت ما هو هيك! نزلنا نشوف طلع شي لونه أسود عم بغلي! سألناها عنه قال هدا دوا! قعدنا على هذا الحال فترة كل يوم الصبح نصحى على الريحة (يعني حرفيا الريحا تصحينا مع انه المطبخ في الطابق الأرضي و غرف النوم في الأول ) و ما نقدر نتنفس من الريحة و ما نصدق نلبس و نهرب من الدار هريبة

الجلطة 8

كان من عادتنا أنا و البنات نشتري الخضرة و الجاج مع بعض و نتشارك فيهم لأنا بكل الأحوال بنطبخ بنتعشى مع بعض و كنا نحسب الصينية معانا. مرة من المرات فاجأتنا بقرار إنها ما بدها تشاركنا في الجاج و بطلت تاكله لأنه معلمتها في الجامعة ما بتاكل جاج و هي بتعتبرها قدوتها بالإضافة إلى إنه الجاج بستخدم طاقة أكبر عشان يستوي من الخضرة فمن باب المحافظة على البيئة بلا منه إذا!قلنا لا إله إلا الله زي ما بدك.. بعد شهرين مرة بنفتح بالفريزر ولا بنلاقي ديك رومي و الله العليم وزنه لا يقل عن أربع كيلوجرامات إذا مش أكتر! إه! لمين هذا؟ إلك يا فلانة؟ إلك يا علانة؟ طبعا أنا و الهنديات سألنا بعض و ما خطر على بالنا يكون الديك الرومي لفتاة الطبيعة ! المهم سألناها طلع لجناب معاليها! طيب يا بنت الناس مش بطلت تطعاطي منتجات حيوانية؟! قال أجا على بالها فاشترت!!!! يعني الكمية أكبر من كمية الدجاج اللي بنستهلكها إحنا التلات بنات في شهر! يعني لما الواحد بيجي على باله شغله بشتري شقفة! تنتين! مش 5 كيلو!طبعا منظرها و هيه بطول الديك من الفريزر و تقعد تكسر فيه عشان تطلع منه شقفة تطبخها من دون تنظيف و لا ما يحزنوا منظر غير شكل

طبعا هي إلها نهفات و جلطات أخرى بس ما بتنحكى اشي لأني بستحي أحكيها غير إني إذا بدي أضلني أحكي في الموضوع مش رح أخلص و رح أقززكم

المهم الحمد لله الذي عافانا مما إبتلانا به


10 comments:

Whisper said...

الله يعينكم بصراحه...انا متأكده انه الكتابه ما اعطتها حقها بطرق الجلط لكن واضح انها كانت مصدر ازعاج :$

بس ضحكت لقلت بس على "فتاة الطبيعه" ههههههههههه جد نهفه :)

الحمد لله اللي خلصتي منها

مياسي said...

لا جد طقع!!

حششششت وانا بقرا
غبا على اصوله

انا قريت الجزء الاول كمان
ذكريتني بايام الامارات الله يرحم:)

ΣcoŞan said...

الصواينه بظلوا صواينه
:*oh:

تعي تفرجي عنا بإربد

أجو استوطنوا كم سنه عنا

انقرضت القطط والكلاب
حيشا السامعين

أكلوا كل اشي

اشي بخزي
وبقرف
وبقلعط


بس بنفس الوقت تحشييش

زي البوست تاعك تماماً
:d


أنا لساتني متابع
اكملي يا فتاه
:cfe:

Palestinian Princess said...

Whisper:

الله يخليكي. أنا حاولت قد ما بقدر إني أنقل الصورة و المشاعر القاتلة بس الصراحة ما وفيتها حقها
:D
على قولتك الحمد لله إنها راحت


بعدين على "فتاة الطبيعة" ما إنت مش عارفة
هي كانت بتدرس إشي إسمه
sustainable design
إللي هو إله علاقة بالمحافظة على البيئة
و الصراحة هية جد طبيعة أكلها كلها صحية و هاي أنا بشهدلها فيها

Palestinian Princess said...

مياسي
يا الله شو بحب إسمك
:)

عشان أكون عادلة لازم أشهد إنه هاي البنت بمنتهى الطيبة و الهبل لكن غباءها ما إله حدود! و أنا مشكلتي إني ما بتحمل الغباء و للأسف إني كنت لئيمة معاها مع إنه مش من عادتي أكون هيك بس شو بدي أعمل و هي مطلعاني عن طوري؟

انت كمان كنت عايشة في الإمارات؟ أكيد كانت ذكريات حلوة
:)

Palestinian Princess said...

Ecosan

المهم كحشتوهم و لا لستهم مستوطنين؟
:D

يا حرام القطط و الكلاب راحت عليهم

أنا الصراحة حذروني من الصينيين بس أنا قلت يعني شو ممكن يصير فقام طلعت على راسي
:re:

أنا هلأ بضحك بس وقتها كنت ببكي
:o

هيني مكمله و الله يعيني و أتذكر كل اللي كان يصير

ReMad said...

lol

:7anoon:

Palestinian Princess said...

allah yejbor b 5a6rak ya ReMad :o

White Freedom said...

ياربي كيف تحملتيها !!؟
بس احسها ذكرى ههههههههههه يعني اذا كنتي يوم زهقانه وتتذكرين ايامك معها بتضحكتين او انك تكون في حالة صدمة من افعالها الماضية :)

بس الحمد لله خلصتي منها

ومعقولة في احد في الدنيا وخاصة من يلد متطور مثل بلدها ماتعرف سيريال ؟؟؟ طيب مو لازم تكون اكلت منه على الاقل شافته في اعلان او تلفزيون

Palestinian Princess said...

White Freedom:

و الله ولا أنا عارفة كيف إتحملتها و حتى البنات اللي شاركوني البيت

المشكلة في الغباء و قلة النظافة و عدم تحمل المسؤولية و أمور و الله أطفال المدارس يعرفونها و هي و لا هي في دنيتنا

أنا عندي إحساس إنها شكلها كانت عايشة في منطقة صينية نائية و الصين جديد فتحت أذرعها للعالم فيمكن عشان هيك ما كانت تعرف

تصوري إنها أول ما سكنا في البيت شافت طولات غرفة الجلوس الصغيرة اللي تكون بين الكنبايات حسبتهم كراسي

إيييييييه! أيام
:)